Etapas
Etapa infantil (2-6 anos)
Umha escola que escuita a tua criança, que a acompanha e a motiva. Onde ela é o centro da aprendizagem, aprendendo para o nosso dia a dia a partir do respeito e aceitaçom, da conversa e o encontro.
Umha escola ativa e consciente de onde está, onde todas temos cabida fazendo parte dum bairro, dum povo, dum conjunto.
Umha escola em que o conhecimento de nós mesmas é chave para nos podermos respeitar (a nós e às demais).
Umha escola onde a autonomia pessoal é um piar para assim medrar em liberdade. Medrar em liberdade e na natureza, observando e trabalhando com o nosso meio, no quintal ou no monte, com os rios ou as poças de lama.
Umha escola onde a nossa língua, as nossas tradiçons, a nossa música… o nosso, estám no dia a dia das aulas enchendo de significado todas as aprendizagens.
Umha escola que nasceu para mudar cousas: a primeira delas, que as nossas crianças nom perdessem a sua língua ao entrarem na escola.
Umha escola que é realmente umha comunidade educativa. Podes formar parte dela!
Primário (6-12 anos)
Somos umha escola internacional homologada pola Conselharia e apoiada pola NEASC (New England Association of Schools and Colleges); seguimos o currículo oficial com imaginaçom, flexibilidade e inovaçom.
Umha escola na qual viver desfrutando do nosso idioma, a partir do qual aprendemos segundas e terceiras línguas, num ambiente respeitoso e ativo.
Umha escola com agrupamentos flexíveis, de diferentes idades, que favorecem a aprendizagem cooperativa e competencial através da aplicaçom contextualizada dos conhecimentos adquiridos.
Umha escola que trabalha por projetos confiando nas crianças para que procurem os seus próprios caminhos de aprendizagem, fomentando a sua autonomia moral e intelectual.
Umha escola transformadora onde toda a comunidade trabalha de maos dadas com a sociedade e onde a nossa prática educativa favorece o pensamento crítico e livre das crianças.
Umha escola em contínuo contacto com a natureza para desfrute e para estudo direto. Umha escola assemblear onde todas as crianças som ouvidas e as opinions levadas em conta para construirmos umha realidade melhor.
Umha escola feminista que entende que todas temos que trabalhar dia a dia para que o futuro seja lilás.
Umha escola inclusiva que se adapta às necessidades, ritmos, interesses e capacidades de cada criança.
Umha escola que, dia a dia, demostra que as cousas, também em educaçom, podem ser feitas doutro jeito!
Rede de Escolas de Ensino Galego
Somos umha rede associativa, sem ánimo de lucro, que promove umha educaçom auto-centrada, multilingue, inclusiva, laica e renovadora pedagogicamente. Contribuímos para a construçom dumha sociedade mais justa e democrática.
