Escolas Semente iniciam o novo ano académico com umha firme aposta pola renovaçom pedagógica, a equidade e o futuro da língua

As Escolas de Ensino Galego Semente iniciam no dia 8 de setembro um novo ano académico com 120 crianças matriculadas nos diferentes centros existentes na Galiza. O projeto, que nasceu há catorze anos em Compostela como iniciativa comunitária para garantir um ensino imersivo em galego desde a primeira infância, conta hoje com cinco centros ativos: Corunha (etapa infantil), Compostela (infantil e primário), Lugo (infantil), Trasancos (infantil e primário) e Vigo (infantil).

A abertura do ano letivo foi precedida, desde o dia 1 de setembro, dum intenso trabalho preparatório: atualizaçom pedagógica das educadoras, assi como labores de melhora das instalaçons em todos os centros, com o objetivo de oferecer um serviço de máxima qualidade educativa e umha experiência acolhedora e estimulante para as crianças.

Novidades do ano académico 2025-2026

O novo período escolar destaca pola aposta decidida pola renovaçom pedagógica, fruto dum processo intensivo de formaçom das educadoras e de reflexom por parte da comissom pedagógica nacional.

Outro eixo fundamental é o multilinguismo aditivo, que fomenta a abertura a outras línguas sem renunciar à centralidade do idioma próprio, fortalecendo tanto a competência linguística como a autoestima cultural do alunado. Ademais, foi publicado recentemente o novo Guia Sociolinguístico para Famílias com o objetivo de que estas tenham recursos práticos para promoverem o uso, prestígio e qualidade da língua galega.

O projeto reforça também a sua vertente comunitária através do alargamento da oferta extra-escolar. Este ano som incorporadas novas atividades culturais e desportivas: dança tradicional, pandeireta, gaita, tamboril, regueifa, futebol gaélico ou teatro, entre outras. Do mesmo modo, é intensificada a organizaçom de acampamentos educativos para crianças e adolescentes, através da iniciativa Ultreia, combinando lazer, desporto e identidade cultural.

Compromisso social e equidade

Coerente com a sua vocaçom transformadora, Semente reforça o seu programa de bolsas para garantir o acesso universal, ampliando o número de apoios destinados a famílias com menos recursos. Este esforço busca assegurar que nengumha criança fique fora do projeto por motivos económicos, fortalecendo assi a funçom social e inclusiva do projeto.

Um modelo para o futuro

Semente é hoje umha realidade consolidada e em crescimento que contribui para a construçom dum modelo educativo alternativo, comunitário e plenamente enraizado no país. Com umha rede de famílias, educadoras e meio milhar sócias, as Escolas de Ensino Galego mostram-se como um espaço fundamental para a transmissom da língua e da cultura próprias, ao tempo que oferecem umha educaçom renovadora e de qualidade. O início deste novo ano formativo confirma que Semente é muito mais do que umha rede escolar: é um projeto social e cultural de futuro, demonstrando que outra educaçom é possível e necessária.