A Festa da Língua da Semente reúne centos de pessoas em Compostela e apresenta nova Federaçom de Escolas de Ensino Galego

Santiago de Compostela, 24 de maio de 2026.– A Festa da Língua das Escolas de Ensino Galego Semente reuniu este sábado 600 pessoas na Sala Brage do Auditório da Galiza, em Santiago de Compostela, num ato que combinou música, reivindicaçom linguística e apresentaçom pública da nova Federaçom de Escolas de Ensino Galego Semente.

O evento contou com um amplo apoio social e institucional, assistindo a alcaidesa, tenente de alcaidesa e concelheira de educaçom do Concelho de Santiago de Compostela, junto a representantes da Real Academia Galega, das universidades públicas, movimentos de renovaçom pedagógica, associaçons culturais, centros sociais, sindicatos e organizaçons estudantis e juvenis. A jornada, apresentada polas regueifeiras do Regueifa Tour, contou com as atuaçons solidárias de Sés, Mondra, Ukestra do Médio, As Bouba e Peter Punk, que se somárom generosamente ao evento em apoio ao projeto educativo de referência no âmbito da iniciativa educativa popular. Além disso, o público assistente puido desfrutar da estreia ao vivo da cançom “Na Semente”, interpretada pola Ukestra do Médio junto com o alunado da Semente, num dos momentos mais emotivos da celebraçom.

No discurso central do ato, o coordenador nacional da Semente, Santiago Quiroga, advertiu da situaçom de emergência linguística que vive o galego, lembrando que “deixou de ser a língua maioritária no País” e que “um terço dos menores de 15 anos nom sabe falá-lo”. Perante este cenário, reivindicou o papel da iniciativa social na revitalizaçom linguística e estabeleceu paralelismos com experiências internacionais como as Ikastolas bascas, as Diwan bretoas ou as Bressolas da Catalunha Norte.

O coordenador nacional salientou também os resultados atingidos pola Semente nos seus quinze anos de trajetória, desde a sua fundaçom no Centro Social A Gentalha do Pichel, destacando “a manutençom linguística do alunado galego-falante, a criaçom de novas falantes, assi como o fortalecimento da sua autoestima cultural”. Além disso, defendeu a necessidade de continuar a construir “um modelo educativo autocentrado, laico, renovador e humanístico”, na linha do projeto impulsionado há mais dum século polas Irmandades da Fala da Corunha, apelando à confluência e ao trabalho conjunto de todas as entidades comprometidas com a galeguizaçom do ensino público e popular para a construçom da Escola Nacional Galega.

Durante o ato foi apresentada oficialmente a Federaçom de Escolas de Ensino Galego Semente, nova estrutura organizativa concebida para reforçar a coordenaçom, melhorar a qualidade educativa e alargar o impacto social do projeto nos próximos anos. A apresentaçom foi acompanhada pola projeçom do seguinte vídeo.

Na intervençom de apresentaçom da Federaçom, Júlio Conde, coordenador estratégico, e Natália Cea, coordenadora pedagógico-linguística, explicárom que a nova estrutura “nom nasce para mudar o rumo do projeto, senom para dotá-lo de melhores condiçons para continuar caminhando na mesma direçom”. Ambos destacárom que a Federaçom pretende “ordenar esforços, acompanhar iniciativas, facilitar a comunicaçom entre projetos e dar resposta comum aos desafios do futuro”.

Na atualidade, as Escolas de Ensino Galego Semente som umha rede associativa sem ánimo de lucro que promove umha educaçom autocentrada, multilingue, inclusiva, laica e pedagogicamente renovadora. O projeto conta atualmente com cinco centros educativos em Lugo, Trasancos, Corunha, Compostela e Vigo, constituindo um modelo educativo comunitário e transformador, comprometido com a língua própria e assente num desenho curricular autocentrado e socialmente comprometido.

O ato finalizou com um chamado coletivo ao compromisso social com a língua própria e com a construçom da Escola Nacional Galega, através das vivas da escola de regueifa da Semente, num ambiente festivo e de forte carga emocional marcado pola ampla participaçom da comunidade educativa e do tecido associativo do país.